You are here

အာဆီယံ-အမေရိကန်ခေါင်းဆောင်များ ထိပ်သီး အစည်းအဝေး ပူးတွဲကြေညာချက်

အာဆီယံ-အမေရိကန်ခေါင်းဆောင်များ ထိပ်သီး အစည်းအဝေး ပူးတွဲကြေညာချက်

Printer-friendly versionSend by email

နေပြည်တော် ဖေဖော်ဝါရီ ၁၇

အမေရိကန်ပြည်ထောင်စု ကယ်လီဖိုးနီးယားပြည်နယ် ဆန်းနီးလန်း၌ ဖေဖော်ဝါရီ ၁၅ ရက်နှင့် ၁၆ ရက်တို့တွင်ကျင်းပသည့် အာဆီယံ-အမေရိကန် ခေါင်းဆောင်များ ထိပ်သီး အစည်းအဝေးတွင် ပူးတွဲ ကြေညာချက်၊ ဆန်းနီးလန်းကြေညာစာတမ်းကို ထုတ်ပြန်ခဲ့သည်။

 

အဆိုပါ ပူးတွဲကြေညာချက်တွင် ကုလသမဂ္ဂ ပဋိညာဉ်စာတမ်း၊ အာဆီယံ ပဋိညာဉ်စာတမ်းနှင့် နိုင်ငံတကာ ဥပဒေတို့တွင် ဖော်ပြပါရှိသည့်မူများနှင့် ရည်ရွယ်ချက်များကို အခိုင်အမာ ထောက်ခံ ကိုင်စွဲခြင်းအားဖြင့် နိုင်ငံအားလုံး၏ အချုပ်အခြာအာဏာပိုင်ဆိုင်မှု၊ နယ်မြေ တည်တံ့ခိုင်မြဲမှု၊ တန်းတူညီတူရှိမှုနှင့် နိုင်ငံရေးဆိုင်ရာ လွတ်လပ်ခွင့်ရှိမှုတို့ကို အပြန်အလှန် လေးစားရန်၊ အသေးစားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးကို အထောက်အကူပြုပြီး ဖွံ့ဖြိုးတိုးတက်မှု ကွာဟချက်ကို ကျဉ်းမြောင်းစေလျက် စီးပွားရေး တိုးတက်မှု၊ အလုပ်အကိုင်အခွင့်အလမ်းဖန်တီးမှု၊ တီထွင် ဆန်းသစ်မှု၊ စွန့်ဦးတီထွင်နိုင်မှုနှင့် ပေါင်းစည်း ဆက်နွှယ်မှုတို့ကို ဖြစ်ပေါ်စေ၍ ထက်မြက် ပွင့်လင်းပြီး ယှဉ်ပြိုင်မှု စွမ်းအား မြင့်မားသော စီးပွားရေးကို ဦးတည်သည့်မူဝါဒများ ကျင့်သုံးခြင်း၏ အရေးပါမှုကို အပြန်အလှန် အသိအမှတ်ပြုရန်၊ ဒီမိုကရေစီ စနစ်ခိုင်မြဲစေခြင်း၊ ကောင်းမွန်သော အုပ်ချုပ်မှု မြှင့်တင်ခြင်း၊ တရားဥပဒေစိုးမိုးမှုကို အလေးထားခြင်း၊ လူ့အခွင့်အရေးနှင့် အခြေခံ လွတ်လပ်မှု တို့ကို ကာကွယ်မြှင့်တင်ခြင်း၊ သည်းခံခွင့်လွှတ်ခြင်းနှင့် အစွန်း မရောက်သော အလယ်အလတ် လမ်းစဉ်ကို အားပေးခြင်းနှင့် သဘာ၀ ပတ်ဝန်းကျင် ထိန်းသိမ်းခြင်း စသည်တို့မှ တစ်ဆင့် ပြည်သူအားလုံးအတွက် အခွင့်အလမ်းများ ဖော်ဆောင်ပေးရေး ကတိကဝတ်ပြုရန်တို့ကို ဖော်ပြထားသည်။

 

ထို့ပြင် ၁၉၈၂ ခုနှစ် ပင်လယ်ပြင် ဥပဒေဆိုင်ရာ ကုလသမဂ္ဂကွန်ဗင်းရှင်း အပါအဝင် တစ်ကမ္ဘာလုံးက လက်ခံအသိအမှတ်ပြုထားသည့် နိုင်ငံတကာ ဥပဒေများနှင့်အညီ ဥပဒေ ရေးရာနှင့် သံတမန်ရေးရာ လုပ်ငန်းစဉ်တို့၏ ရလဒ်ကို လေးစားခြင်းအပါအဝင် ခြိမ်းခြောက်ခြင်းနှင့် အင်အားအသုံးပြုခြင်းမရှိဘဲ အငြင်းပွားမှုကို ငြိမ်းချမ်းစွာ ဖြေရှင်း သွားရန်၊ အကြမ်းဖက်မှု၊ အစွန်းရောက်မှု၊ မူးယစ်ဆေးဝါး ရောင်းဝယ်မှု၊ လူမှောင်ခို ကုန်ကူးမှုနှင့် တရားမဝင်၊ အကြောင်းမကြား၊ ထိန်းချုပ်မှုမရှိသော ငါးဖမ်းမှု တို့သာမက သားရဲ တိရစ္ဆာန်နှင့် သစ်များ တရားမဝင်ကူးသန်းရောင်းဝယ်မှု အစရှိသည့် တစ်ကမ္ဘာလုံး နှင့် သက်ဆိုင်သော ကိစ္စရပ်များကို ဖြေရှင်းရာတွင် ဦးစီး ဆောင်ရွက်သွားရန်တို့ ပါရှိသည်။

 

အလားတူ တာဝန်ယူမှုရှိသည့် နိုင်ငံ၏အပြုအမူဆိုင်ရာ စံနှုန်းသတ်မှတ်ချက်များနှင့်အညီ ဆိုက်ဘာ ကွန်ရက်လုံခြုံရေးနှင့် တည်ငြိမ်ရေးကိုမြှင့်တင်ရန်၊ အာဆီယံ အသိုက်အဝန်း၏ မျှော်မှန်းချက်များ အောင်မြင်ရန်အတွက် အာဆီယံနှင့် အမေရိကန်ပြည်သူများ အထူးသဖြင့် လူငယ်လူရွယ်များအကြား ထိတွေ့ ဆက်ဆံသည့်အစီအစဉ်နှင့် ပြည်သူ အားလုံး အထူးသဖြင့် လုံခြုံမှုမရှိသူများအတွက် အခွင့်အလမ်းများ တိုးမြှင့်သည့် အစီအစဉ်တို့မှတစ်ဆင့် ပြည်သူများအကြား ကူးလူးဆက်ဆံမှုကို တိုးမြှင့်ရန် စသည့်အချက်များ ဖော်ပြပါရှိသည်။

 

အဆိုပါ ပူးတွဲကြေညာချက်၊ ဆန်းနီးလန်း ကြေညာစာတမ်း အပြည့်အစုံကို www.whitehouse.gov နှင့် www.asean.org တို့တွင် ဖတ်ရှုနိုင်သည်။

 

 

 

 

 

 

 

www.president-office.gov.mm
This is the official website of Myanmar President Office